കണ്ണൂർ: കണ്ണൂർ സെൻട്രൽ ജയിലിൽ നിന്ന് ഇന്ന് പുലർച്ചെ തടവുചാടിയ സൗമ്യ വധക്കേസ് പ്രതി ഗോവിന്ദച്ചാമിയെ പിടികൂടി. തളാപ്പ് ഭാഗത്തെ ആളൊഴിഞ്ഞ പറമ്പിലെ കിണറ്റിനുള്ളിൽ ഒളിച്ചിരിക്കുകയായിരുന്ന ഗോവിന്ദച്ചാമിയെ പോലീസ് കണ്ടെത്തി പിടികൂടുകയായിരുന്നു. ഇയാളെ പോലീസ് പിടികൂടുന്നതിന്റെ ദൃശ്യങ്ങൾ ഉൾപ്പെടെ പുറത്തുവന്നിട്ടുണ്ട്.
തടവുചാടിയ ഗോവിന്ദച്ചാമിക്കായി കണ്ണൂരിലും പരിസരത്തും പോലീസ് വ്യാപകമായ തിരച്ചിൽ നടത്തിവരികയായിരുന്നു. സെൻട്രൽ ജയിലിൽ നിന്ന് ഏകദേശം നാല് കിലോമീറ്റർ ദൂരം മാത്രമാണ് ഇയാൾക്ക് സഞ്ചരിക്കാൻ സാധിച്ചത്. പോലീസും നാട്ടുകാരും സംയുക്തമായി തിരച്ചിലിന് ഇറങ്ങിയതോടെ കൂടുതൽ മുന്നോട്ട് പോകാനാകാതെ, ഈ കൊടും ക്രിമിനൽ കിണറ്റിലിറങ്ങി ഒളിച്ചിരിക്കുകയായിരുന്നു.
ജയിൽ ചാടുമ്പോൾ കറുത്ത ഷർട്ടും കറുത്ത പാന്റും ധരിച്ചാണ് ഇയാൾ ഇറങ്ങിയത്. പുറത്തിറങ്ങിയതിന് പിന്നാലെ കറുത്ത ഷർട്ട് മാറ്റി വെളുത്ത ഷർട്ട് ധരിച്ചതായും, തലയിലൊരു ചാക്ക് കെട്ടി അതിൽ മുറിക്കൈ ഒളിപ്പിച്ച് നടന്നുപോകുന്നതിന്റെ സിസിടിവി ദൃശ്യങ്ങൾ പുറത്തുവന്നിരുന്നു. മണിക്കൂറുകൾ നീണ്ട തിരച്ചിലിനൊടുവിലാണ് ഇയാളെ വലയിലാക്കാൻ പോലീസിന് സാധിച്ചത്.
