ബാങ്ക് ചെയർമാൻ എൻ.കെ. അബ്ദുറഹ്മാൻ പറഞ്ഞതിങ്ങനെ: "കെട്ടിടം പണിയുന്നതിനായി നബാർഡിൽ നിന്ന് 50 കോടി രൂപ വായ്പയെടുത്തു. ഊരാളുങ്കലിന് ഇനിയും 8 കോടി രൂപ നൽകാനുണ്ട്. ഈ സ്വപ്നപദ്ധതി പൂർത്തിയാക്കാൻ ഇനിയും 20 കോടി രൂപ കൂടി വേണ്ടിവരും. അത്രയും പണം ഇപ്പോൾ ബാങ്കിന് ചെലവഴിക്കാൻ പ്രയാസമാണ്. അതുകൊണ്ട് പദ്ധതിയിൽ നിന്ന് പിന്മാറുകയല്ലാതെ മറ്റ് വഴിയില്ല."
150 കോടി രൂപയുടെ പദ്ധതിയായിരുന്നു സഹകരണ മ്യൂസിയത്തിനായി വിഭാവനം ചെയ്തിരുന്നത്. ഇതിനകം 72 കോടി രൂപ ചെലവഴിച്ചു കഴിഞ്ഞു. 14 നിലകളിലായി ഒരു ലക്ഷം ചതുരശ്ര അടി വിസ്തീർണ്ണമുള്ള കെട്ടിടത്തിൽ ഇന്റീരിയർ ജോലികൾ മാത്രമാണ് ഇനി ബാക്കിയുള്ളത്. നൂറോളം കാറുകളും ഇരുചക്രവാഹനങ്ങളും നിർത്താനുള്ള പാർക്കിങ് സൗകര്യവും കെട്ടിടത്തിലുണ്ടായിരുന്നു.
"കേന്ദ്രസർക്കാരിൽ നിന്ന് ഗ്രാന്റും മറ്റും കിട്ടാൻ സാധ്യതയുണ്ടായിരുന്നു. പക്ഷേ, അതിനെല്ലാം ഡൽഹിയിൽ പോയി വലിയ ശ്രമം നടത്തേണ്ടതുണ്ട്. ആരോഗ്യപ്രശ്നങ്ങൾ കാരണം അതിനൊന്നും എനിക്ക് ഇപ്പോൾ സാധിക്കാത്ത അവസ്ഥയിലാണ്," എൻ.കെ. അബ്ദുറഹ്മാൻ കൂട്ടിച്ചേർത്തു. കൂടാതെ, സഹകരണ മേഖലയിൽ ബാങ്കിന് നഷ്ടമുണ്ടാക്കുന്ന പദ്ധതികളിലൊന്നും പണം നിക്ഷേപിക്കരുതെന്ന സർക്കാരിന്റെ പുതിയ നിർദേശവും ബാങ്കിന് തിരിച്ചടിയായി. "വായ്പ നൽകണം, പക്ഷേ തിരിച്ചടച്ചില്ലെങ്കിൽ ജപ്തി ചെയ്യാൻ പാടില്ലെന്ന നിർദേശവുമുണ്ട്. ഈ സാഹചര്യങ്ങളിൽ ഇത്തരമൊരു വലിയ പദ്ധതിയുമായി മുന്നോട്ട് പോകാൻ സാധിക്കില്ല," അദ്ദേഹം വ്യക്തമാക്കി.
സഹകരണ മേഖലയുടെ സമഗ്രമായ ചരിത്രവും വർത്തമാനവും പറയുന്ന ഒരു മ്യൂസിയമായിരുന്നു ഈ പദ്ധതിയിലൂടെ ലക്ഷ്യമിട്ടിരുന്നത്. കെട്ടിടത്തിന്റെ വ്യത്യസ്തമായ രൂപകൽപ്പന ഇതിനോടകം തന്നെ ആളുകളുടെ ശ്രദ്ധ ആകർഷിച്ചിരുന്നു. കേന്ദ്ര-സംസ്ഥാന സർക്കാരുകളുടെ പിന്തുണ ലഭിക്കുകയാണെങ്കിൽ പദ്ധതിയുമായി ഇനിയും മുന്നോട്ട് പോകാൻ സാധ്യതയുണ്ടെന്നും എൻ.കെ. അബ്ദുറഹ്മാൻ അറിയിച്ചു.
