വൈകുന്നേരം ഏകദേശം അഞ്ചരയോടെ കാലിക്കറ്റ് ടെക്സ്റ്റൈൽസ് എന്ന സ്ഥാപനത്തിലാണ് ആദ്യം തീപിടുത്തമുണ്ടായത്. ശക്തമായ കാറ്റിൽ വളരെ വേഗത്തിൽ തീ അടുത്തുള്ള മറ്റ് കടകളിലേക്കും വ്യാപിച്ചു.
പ്രാഥമിക വിവരങ്ങൾ അനുസരിച്ച് ആളപായമൊന്നും റിപ്പോർട്ട് ചെയ്തിട്ടില്ല എന്നത് ആശ്വാസകരമാണ്. എന്നാൽ, തീപിടിത്തത്തിന്റെ കാരണം ഇപ്പോഴും വ്യക്തമായിട്ടില്ല. സ്റ്റാൻഡിൽ നിർത്തിയിട്ടിരുന്ന മുഴുവൻ ബസുകളും സുരക്ഷിതമായി മാറ്റിയിട്ടുണ്ട്. തീപിടിച്ച കെട്ടിടത്തിൽ ഉണ്ടായിരുന്ന ആളുകളെ ഉടൻതന്നെ ഒഴിപ്പിക്കുകയും സമീപത്തെ കടകൾ അടപ്പിക്കുകയും ചെയ്തു.
ഞായറാഴ്ച വൈകുന്നേരമായതിനാൽ നഗരത്തിൽ വലിയ ജനക്കൂട്ടം ഉണ്ടായിരുന്നു. എന്നാൽ, പോലീസിന്റെയും അഗ്നിരക്ഷാ സേനയുടെയും സമയോചിതമായ ഇടപെടൽ മൂലം ആളുകളെ ഉടൻതന്നെ ഒഴിപ്പിക്കാൻ സാധിച്ചതുകൊണ്ട് വലിയൊരു അപകടം ഒഴിവാക്കാൻ കഴിഞ്ഞു. തീയണയ്ക്കാനുള്ള ശ്രമങ്ങൾ ഇപ്പോഴും പുരോഗമിക്കുകയാണ്. കൂടുതൽ വിവരങ്ങൾ ലഭ്യമാകുന്നതിനനുസരിച്ച് അറിയിക്കുന്നതാണ്.
