തെരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് സ്റ്റൈപ്പന്റോടെ ഒരു വർഷത്തെ സാങ്കേതികവിദ്യാ പരിശീലനം നൽകും. ഈ പരിശീലനം വിജയകരമായി പൂർത്തിയാക്കുന്നവർക്ക് ഊരാളുങ്കൽ സൊസൈറ്റിയിൽ പ്ലേസ്മെന്റ് ഉറപ്പാക്കും.
പത്താം ക്ലാസോ പ്ലസ് ടുവോ പാസായ 18 നും 25 നും ഇടയിൽ പ്രായമുള്ള യുവതീയുവാക്കൾക്ക് ഈ അവസരത്തിനായി അപേക്ഷിക്കാം. നിർമ്മാണ പ്രവൃത്തിയിൽ മുൻപരിചയമുള്ളവർക്ക് മുൻഗണന നൽകും. കൂടാതെ, അപേക്ഷകർക്ക് മതിയായ ശാരീരികക്ഷമതയും ഉണ്ടായിരിക്കണം.
ഈ പദ്ധതിയിലേക്ക് അപേക്ഷിക്കാൻ താല്പര്യമുള്ളവർക്ക് മേയ് 24-നകം https://forms.gle/bMto9aiAtmWLno5d9 എന്ന ലിങ്ക് വഴി ഓൺലൈനായി അപേക്ഷ സമർപ്പിക്കാവുന്നതാണ്. കൂടുതൽ വിവരങ്ങൾക്കായി 8301001755 എന്ന നമ്പറിൽ ബന്ധപ്പെടാവുന്നതാണ്.
തെരഞ്ഞെടുക്കപ്പെടുന്നവർക്ക് കൊല്ലം ചവറയിൽ ഊരാളുങ്കൽ സൊസൈറ്റിയുടെ മേൽനോട്ടത്തിൽ പ്രവർത്തിക്കുന്ന ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫ്രാസ്ട്രക്ചർ ആൻഡ് കൺസ്ട്രക്ഷനി(IIIC)ലാണ് പരിശീലനം നൽകുന്നത്. കേരള അക്കാദമി ഫോർ സ്കിൽ എക്സലൻസി(KASE)യുടെയും രാജ്യത്തെ പ്രമുഖ വിദ്യാഭ്യാസ സ്ഥാപനങ്ങളുടെയും സഹകരണത്തോടെയാണ് പരിശീലന പരിപാടികൾ ക്രമീകരിച്ചിരിക്കുന്നത്.
പരിശീലനത്തിന്റെ ഭാഗമായി ആദ്യത്തെ ആറുമാസം തിയറിയും പ്രാക്ടിക്കലും ഉൾപ്പെടുന്ന നൈപുണ്യ പരിശീലനം ക്ലാസ് മുറികളിലും അത്യാധുനിക ലാബുകളിലും ഊരാളുങ്കൽ സൊസൈറ്റിയുടെ വിവിധ വർക്ക് സൈറ്റുകളിലുമായി നടക്കും. ശേഷിക്കുന്ന ആറുമാസം പൂർണ്ണമായും വർക്ക് സൈറ്റുകളിലെ അപ്രന്റീസ്ഷിപ്പായിരിക്കും. പരിശീലനത്തിനിടയിലും പരിശീലനം പൂർത്തിയാക്കിയ ശേഷവും ഉദ്യോഗാർത്ഥികളുടെ പ്രായോഗിക പരിജ്ഞാനം വിലയിരുത്തുന്നതിനായി ടെസ്റ്റുകൾ ഉണ്ടായിരിക്കും.
ബിൽഡിംഗ്, റോഡ് ടെക്നോളജികളിൽ ഐഐഐസിയിൽ നടക്കുന്ന തിയറി ക്ലാസുകൾ ഊരാളുങ്കൽ സൊസൈറ്റിയിലെ പരിചയസമ്പന്നരായ എഞ്ചിനീയർമാരും ഐഐഐസിയിലെ നിർമ്മാണ വ്യവസായ വിദഗ്ധരും നയിക്കും. ബാർ ബെൻഡിങ്, സ്റ്റേജിങ്, സ്കഫോൾഡിങ്, ഷട്ടറിങ്, കോൺക്രീറ്റ്, റോഡ് ജോലികൾ തുടങ്ങി നിർമ്മാണവുമായി ബന്ധപ്പെട്ട എല്ലാ പ്രധാന പ്രക്രിയകളും പാഠ്യപദ്ധതിയിൽ ഉൾക്കൊള്ളിച്ചിട്ടുണ്ട്. ഈ പരിശീലന പദ്ധതിയിൽ ഐഐഐസിയിലെ അദ്ധ്യാപകരും ഊരാളുങ്കൽ സൊസൈറ്റിയിലെ ലീഡർമാരും എഞ്ചിനീയർമാരുമാണ് പ്രധാനമായും പരിശീലനം നൽകുന്നത്. കേരളത്തിൽ സ്ഥിരതാമസമാക്കിയ ഉദ്യോഗാർത്ഥികൾക്ക് ഈ അവസരത്തിനായി അപേക്ഷിക്കാവുന്നതാണ്.
രാജ്യത്ത് രാഷ്ട്ര നിർമ്മാണത്തിന് വിദഗ്ധരായ തൊഴിലാളികളുടെ ആവശ്യം വർധിച്ചു വരുന്ന സാഹചര്യത്തിൽ, ഈ കുറവ് പരിഹരിക്കുന്നതിനും നിർമ്മാണ രംഗത്ത് സവിശേഷമായ തൊഴിൽ സംസ്കാരത്തോടെ വിദഗ്ധ തൊഴിൽ സേനയെ വാർത്തെടുക്കുന്നതിനുമാണ് ഊരാളുങ്കൽ സൊസൈറ്റി ഈ പദ്ധതിക്ക് രൂപം നൽകിയിരിക്കുന്നത്. ഇതിലൂടെ, യുവാക്കൾ തൊഴിലിനായി വിദേശങ്ങളിലേക്ക് പോകുന്ന സാഹചര്യം ഒരു പരിധി വരെ ഒഴിവാക്കാനും ആധുനിക സമ്പ്രദായങ്ങളും സാങ്കേതികവിദ്യകളും യന്ത്രോപകരണങ്ങളുടെ പ്രവർത്തനവുമെല്ലാം പരിശീലിപ്പിച്ച് അവരെ തൊഴിലിന് പ്രാപ്തരാക്കാനും ഈ പദ്ധതി ലക്ഷ്യമിടുന്നു. രാജ്യത്തെ അക്കാദമിക ലോകവും നിർമ്മാണ വ്യവസായവും ഈ ഉദ്യമത്തിൽ ഒരുമിച്ച് കൈകോർക്കുകയാണ്.
