അറവുഫാക്ടറിയിൽ നടക്കുന്ന ദുരുപയോഗങ്ങളും നിയമലംഘനങ്ങളും മാസങ്ങളായി വാർത്തയാക്കി പുറത്തുകൊണ്ടുവരുന്നത് ചിലർക്ക് അസഹനീയമായതിന്റെ പ്രതിഫലനമാണ് ഈ കേസ്. അധികാരികൾ തങ്ങളുടെ സ്വാധീനം ഉപയോഗിച്ച് മാധ്യമപ്രവർത്തകരെ ഭീഷണിപ്പെടുത്താൻ ശ്രമിക്കുകയാണെന്ന് ഒമാക് ഭാരവാഹികൾ ആരോപിച്ചു. ഇത് അടിസ്ഥാന മനുഷ്യാവകാശത്തിനെതിരെയുള്ളതും മാധ്യമസ്വാതന്ത്ര്യത്തിനു നേരെയുള്ള ആക്രമണവുമാണ്.
നിയമവിരുദ്ധ പ്രവർത്തനങ്ങൾക്ക് കണ്ണടച്ചുനിൽക്കുന്ന ഔദ്യോഗിക സംവിധാനങ്ങൾക്കൊപ്പം ഫാക്ടറി മാനേജ്‌മെന്റ് നിന്നാൽ അതിന് തുല്യമായ പ്രതികരണമാണ് ലഭിക്കുകയെന്ന് യോഗം മുന്നറിയിപ്പ് നൽകി. കേരളത്തിലെ ഓരോ ഓൺലൈൻ മാധ്യമങ്ങളും ഇത്തരം നിയമലംഘനങ്ങൾ അതേ തീവ്രതയിൽ റിപ്പോർട്ട് ചെയ്യും. ഒരാൾക്കെങ്കിലും കള്ളക്കേസ് കൊടുത്ത് മുഴുവൻ മാധ്യമലോകത്തെയും നിശ്ശബ്ദരാക്കാമെന്ന് അധികാരികൾ കരുതേണ്ടെന്നും അസോസിയേഷൻ വ്യക്തമാക്കി.
മാധ്യമപ്രവർത്തനത്തിന്റെ വിശുദ്ധിയും സ്വാതന്ത്ര്യവും ഇപ്പോൾ പുനർമൂല്യനിർണയത്തിന് വിധേയമാകുകയാണ്. ഇത്തരം ഭീഷണികൾക്ക് മുന്നിൽ പിന്നോട്ട് പോകാൻ ഒരു മാധ്യമത്തിനും സാധ്യമല്ല. അംഗങ്ങൾക്കു വേണ്ട എല്ലാ നിയമസഹായവും സുരക്ഷയും ഉറപ്പാക്കുമെന്നും ഒമാക് യോഗം പ്രഖ്യാപിച്ചു. മാധ്യമപ്രവർത്തനത്തെ തടസ്സപ്പെടുത്താനുള്ള ഇത്തരം നീക്കങ്ങൾക്കെതിരെ ശക്തമായ നിലപാട് സ്വീകരിക്കുമെന്നും യോഗം അറിയിച്ചു.
