സംസ്ഥാന സർക്കാരിന്റെ പൊതുവിദ്യാഭ്യാസ വകുപ്പ് പുറപ്പെടുവിച്ച ഉത്തരവ് പ്രകാരം (സ. ഉ. കൈ (നമ്പർ) 109/2023/പൊ.വി.വ.), സഭയിലെ ജനറൽ കാറ്റഗറിയിൽപെടുന്ന (ജാതി സംവരണം ലഭിക്കാത്തവർ) അംഗങ്ങളുടെ ഔദ്യോഗിക സമുദായ നാമം 'സീറോ മലബാർ സിറിയൻ കാത്തലിക്' (Syro Malabar Syrian Catholic) എന്ന് നിജപ്പെടുത്തിയിട്ടുണ്ട്. ഇനിമുതൽ സ്കൂൾ റെക്കോർഡുകളിലും മറ്റ് ഔദ്യോഗിക രേഖകളിലും ഈ നാമമാണ് ഉപയോഗിക്കേണ്ടത്.
കുട്ടികളെ ഒന്നാം ക്ലാസ്സിൽ പ്രവേശിപ്പിക്കുമ്പോൾ സ്കൂൾ അഡ്മിഷൻ രജിസ്റ്ററിലെ 'മതം' എന്ന കോളത്തിൽ 'ക്രിസ്ത്യൻ' എന്നും, അതിനു താഴെ വരുന്ന ജാതി/Denomination കോളത്തിൽ 'സീറോ മലബാർ സിറിയൻ കാത്തലിക്' എന്നുമാണ് ചേർക്കേണ്ടത്. മുൻകാലങ്ങളിൽ ഉപയോഗിച്ചിരുന്ന RC, RCSC, RCS, SC തുടങ്ങിയ ചുരുക്കെഴുത്തുകൾ ഇനിമേൽ ഔദ്യോഗിക രേഖകളിൽ ഉപയോഗിക്കാൻ പാടില്ല.
നിലവിൽ സ്കൂളുകളിൽ പഠിച്ചുകൊണ്ടിരിക്കുന്ന കുട്ടികളുടെ രജിസ്റ്ററുകളിലും, രക്ഷാകർത്താക്കളുടെ അപേക്ഷ പ്രകാരം ഈ തിരുത്തൽ വരുത്താൻ സ്കൂൾ അധികൃതർ ശ്രദ്ധിക്കണം. അതേസമയം, നിലവിൽ OBC/OEC സംവരണം ലഭിച്ചുകൊണ്ടിരിക്കുന്ന സഭാംഗങ്ങൾ അവർക്ക് നിലവിലുള്ള സമുദായ നാമങ്ങൾ തന്നെയാണ് സ്കൂൾ രജിസ്റ്ററിൽ ചേർക്കേണ്ടതെന്നും രൂപത പുറത്തിറക്കിയ സർക്കുലറിൽ വ്യക്തമാക്കുന്നു.
