ഇന്ന് ഉച്ചയ്ക്ക് രണ്ട് മണിയോടെയാണ് ജിയോ നെറ്റ്‌വർക്ക് ലഭ്യമല്ലെന്ന് ഡൗൺഡിറ്റക്ടർ വെബ്സൈറ്റിൽ ഉപഭോക്താക്കൾ പരാതികൾ രേഖപ്പെടുത്താൻ തുടങ്ങിയത്. മിനിറ്റുകൾക്കകം 7,000-ത്തിലധികം പരാതികളാണ് രേഖപ്പെടുത്തിയത്. ഇത് ഡൗൺഡിറ്റക്ടറിൽ സമർപ്പിക്കപ്പെട്ട പരാതികളുടെ മാത്രം കണക്കാണെന്നും, യഥാർത്ഥത്തിൽ സേവന തടസ്സം നേരിട്ട ഉപഭോക്താക്കളുടെ എണ്ണം ഇതിലും കൂടുതലായിരിക്കുമെന്നും വിലയിരുത്തപ്പെടുന്നു.
മൊബൈൽ ഇന്റർനെറ്റ് ലഭ്യമല്ലെന്നായിരുന്നു മിക്ക ഉപഭോക്താക്കളുടെയും പ്രധാന പരാതി. മൊബൈൽ കോളുകൾ ലഭിക്കാത്തതും, ജിയോഫൈബർ സേവനങ്ങൾ തടസ്സപ്പെട്ടതും തൊട്ടുപിന്നാലെ റിപ്പോർട്ട് ചെയ്യപ്പെട്ടു. സാമൂഹിക മാധ്യമ പ്ലാറ്റ്‌ഫോമായ എക്സിലും നിരവധി ഉപഭോക്താക്കൾ ജിയോ നെറ്റ്‌വർക്ക് തടസ്സപ്പെട്ടതിനെക്കുറിച്ച് പോസ്റ്റുകൾ പങ്കുവെച്ചിട്ടുണ്ട്. കേരളത്തിൽ നിന്നുള്ള നിരവധി ഉപഭോക്താക്കളും ജിയോ സേവനങ്ങൾ ലഭിക്കാത്തതിനെക്കുറിച്ച് എക്സിൽ പരാതികൾ ഉന്നയിച്ചിട്ടുണ്ട്.
ജിയോ നെറ്റ്‌വർക്ക് തടസ്സപ്പെടാനുള്ള കാരണം ഇതുവരെ വ്യക്തമല്ല. സേവനങ്ങൾ പുനഃസ്ഥാപിക്കാനുള്ള ശ്രമങ്ങൾ നടക്കുന്നുണ്ടോ എന്നതിനെക്കുറിച്ചും ഔദ്യോഗിക വിവരങ്ങൾ ലഭ്യമല്ല.
