നൃത്തച്ചുവട് തെറ്റിച്ച വിദ്യാർത്ഥിനിക്ക് മർദ്ദനം: പൊലീസ് അന്വേഷണത്തിന് ഉത്തരവിട്ട് മനുഷ്യാവകാശ കമ്മീഷൻ

നൃത്തച്ചുവടുകൾ തെറ്റിച്ചതിന് 11കാരിയെ നൃത്താധ്യാപകൻ മർദ്ദിക്കുകയും മാനസികമായി പീഡിപ്പിക്കുകയും  ചെയ്തെന്ന  പരാതിയിൽ മനുഷ്യാവകാശ കമ്മീഷൻ കേസെടുത്ത് പൊലീസ് അന്വേഷണത്തിന് ഉത്തരവിട്ടു. 

കോഴിക്കോട് ടൗൺ പൊലീസ് അസി. കമ്മീഷണർ അന്വേഷണം നടത്തി 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ആക്റ്റിങ്  ചെയർപേഴ്സണും ജുഡീഷ്യൽ അംഗവുമായ കെ. ബൈജൂനാഥ് ആവശ്യപ്പെട്ടു. നവംബർ 28ന്  കോഴിക്കോട്  നടക്കുന്ന സിറ്റിംഗിൽ കേസ് പരിഗണിക്കും.  

 എരഞ്ഞിക്കലിൽ പ്രവർത്തിക്കുന്ന നൃത്ത വിദ്യാലയത്തിനെതിരെയാണ് പരാതി. സിബിഎസ്ഇ കലോത്സവത്തോട് അനുബന്ധിച്ച് ഒക്ടോബർ 27 ന് നടന്ന പരിശീലനത്തിനിടയിലാണ് സംഭവം. 

തുടർന്ന് സ്ത്രീകളുടെയും കുട്ടികളുടെയും ആശുപത്രിയിൽ കുട്ടി ചികിത്സ തേടി. മാതാപിതാക്കൾ എലത്തൂർ പൊലീസ് സ്റ്റേഷനിൽ പരാതി നൽകിയിരുന്നു.