ഇന്ന് വിഷു; ഏവർക്കും പ്രസ്ക്ലിപ് ന്യൂസിന്റെ വിഷു ആശംസകൾ



കണിക്കൊന്നയും കണിവെള്ളരിയും ഓട്ടുരുളിയിൽ നിറച്ച് മലയാളി വിഷു ആഘോഷിക്കുകയാണ്. വര്‍ഷം മുഴുവന്‍ നീണ്ടുനില്‍ക്കേണ്ട നന്മകളുടെ പ്രതീക്ഷകളുമായാണ് വിഷുപ്പുലരിയിലേക്ക് ഓരോ മലയാളിയും കണ്ണ് തുറക്കുന്നത്.

ശബരിമല, ഗുരുവായൂര്‍, ചോറ്റാനിക്കര തുടങ്ങി സംസ്ഥാനത്തെ പ്രമുഖ ക്ഷേത്രങ്ങളിലെല്ലാം വിഷുക്കണിയൊരുക്കിയിരുന്നു. കഴിഞ്ഞ രണ്ടു വര്‍ഷങ്ങളായി ആഘോഷങ്ങള്‍ക്ക് മേല്‍ കരിനിഴലായി നിന്നിരുന്ന കോവിഡ് ഭീതി ഇക്കുറി മാറി നില്‍ക്കുന്നതിനാല്‍ ആഘോഷങ്ങള്‍ വീണ്ടും സജീവമാകുകയാണ്.

വിഷുവിനു ചെയ്യുന്ന കാര്യങ്ങളുടെ ഫലങ്ങൾ അടുത്ത ഒരു കൊല്ലക്കാലം നിൽക്കുമെന്നാണു വിശ്വാസം. അതുകൊണ്ട് തന്നെയാണ് ഈ പുലരിക്കാഴ്ച പ്രതീക്ഷകളുടെ കൂടി ഉൽസവമാകുന്നത്.

ഓട്ടുരുളിയെ പ്രപഞ്ചത്തോട് ചേർത്തുവയ്ക്കുന്നതാണ് സങ്കൽപം. അതിലേക്ക് വാൽക്കണ്ണാടി, ഗ്രന്ഥം, സ്വർണം, ഞൊറിഞ്ഞ കസവുമുണ്ട്, ഉണങ്ങലരി, കൃഷ്ണവിഗ്രഹം, നാണയങ്ങൾ, പലതരം ഫലങ്ങളും. ഒപ്പം സ്വർണ നിറത്തിൽ കൊന്നപ്പൂവും. കേരളത്തിന്റെ തനത് ഉൽവസത്തിന് ഇത്തവണയും നിറമൊട്ടും കുറവല്ല. കൊന്നപ്പൂ കൃഷ്ണന്റെ കിരീടവും കണിവെള്ളരി മുഖവും വിളക്കിലെ തിരി കണ്ണുകളായും മാറുമ്പോൾ ആ കാഴ്ചയിൽ നിറയുന്നത് മണ്ണും വിണ്ണും മലയാളിയുടെ മനസും കൂടിയാണ്. കൈനീട്ടത്തിനൊപ്പം സ്‌നേഹവും നന്മകളും സമൃദ്ധിയും അകത്തും പുറത്തും പുലരട്ടെ എന്ന പ്രാർഥനയും.

Post a Comment

0 Comments